Basotho ba 90,000 ba Tla Fumana Metsi a Hloekileng Tlasa Morero oa Phano ea Metsi Maseru le Libakeng tse Haufi
16 Motšeanong 2025 ka Pascalinah Kabi
Mokhethoa oa Likotsi, Itumeleng Rantšo, o re baetapele ba sechaba ba tlameha ho sebetsa ‘moho ho fumana tharollo ea mochoelella qholotsong eo Basotho ba bangata ba bonahalang ba sa itokisetsa ho lefella metsi a fanoang ke Kompone ea Metsi le Likhoerekhoe (WASCO).
Rantšo o buile sena ha a ne a lebohela sechaba se tla fumana metsi tlasa Morero oa Phano ea Metsi Maseru le Libakeng tse Haufi (The Greater Maseru Water Supply Project). Morero ona o lebelletsoe ho fihlela Basotho ba ka bang 90,000 ka phepelo ea metsi a hloekileng lipakeng tsa selemo sa 2025 le 2040.
Morero ona o ile oa khakoloa ka molao ke Mongoli e Moholo oa Lekala la Lihloliloeng, Relebohile Lebeta, ka la 3 Motšeanong 2025, sebakeng sa Maqhaka, Berea.
Bakeng sa litaba tse felletseng, mamela khatiso eo ho eona u tla utloa maikutlo a kemeli ea WASCO, sechaba, bakhethoa hammoho le mokonteraka ea abetsoeng mosebetsi ona.
