3 Pulungoana 2023 ka Pascalinah Kabi

Le hoja ho tumme lefatše ka bophara hore Lesotho ke naha e nang le metsi a mangata haholo, e ntse e le pharela ho Basotho ba bangata ho fumana metsi ntle le tšitiso ea letho. Ke bonyane malapa a fetang lekholo le mashome a mane, a phelang motseng oa Ha Makebe, Sehlabeng-sa-Thuoathe.

Le hoja malapa ana a fumana metsi selibeng se bolokehileng hona motseng oo, seliba sena se hole le malapa a kang la ntate Monekoa Mokone (82) le mofumahali oa hae ‘m’e ‘Mamotebang Mokone (70).

Joaloka metseng eohle ea Sehlabeng-sa-Thuoathe, metsi e ntse e le pharela ho lelapa la ntate Mokone le bahaisane ba bona motseng oo oa Ha Makebe.